Hai veces no que a
ficción é capaz de predicir a realidade cunha precisión asombrosa; esperemos
que este non sexa o caso. Por agora é só unha casualidade, pero resulta
realmente curiosa: o videoxogo de acción Homefront xa predixo a morte de
Kim-Jong Il neste ano 2011, e a súa sucesión por parte do seu fillo menor
Kim-Jong Un. Ata aquí o guionista do xogo, John Milius, acertou sen esperalo co
que ía pasar meses despois (Homefront lanzouse en marzo de
2011).
O que esperamos que
non se cumpra é todo o que vén despois. No xogo, Kim Jong-Un é capaz de reunificar
as dúas Coreas e aproveita unha gran
crise mundial (con EEUU intentando reprimir unha secesión en Texas, Irán e Arabia
Saudita en guerra e un encarecemento do gas e do petróleo en Europa Occidental
por unha alianza ruso-ucraína) para anexionar a nova República Coreana con Xapón
e todo o Sueste Asiático...
Uns anos despois,
en 2022, EEUU colapsa baixo o peso dunha terrible crise social e económica; e
tres anos máis tarde un arma nuclear coreana explota na atmosfera sobre EEUU. É
o primeiro paso dunha manobra de ocupación que culmina con Norteamérica
dividida en dúas partes por un río Mississippi contaminado pola radiación,
Hawaii e San Francisco conquistados por Corea e un progresivo despregamento
militar inimigo en todo o Medio Oeste.
Este é só o punto
de partida do xogo, no que o ex-marine Robert Jacobs acaba por converterse nun
heroe da resistencia, enfrontándose nunha guerra de guerrillas contra o inimigo
coreano. Homefront predixo a morte de Kim-Jong Il e a sucesión do seu fillo
menor, Kim-Jong Un; esperemos que non se achegue sequera á realidade no resto
das súas predicións sobre o futuro.